عطلة وطنية سعيدة وصحية

قد تعني عطلة الأعياد الوطنية أشياء مختلفة لكل واحد فينا. على سبيل المثال، البعض عطلة العيد عنده تعني المسيرات والهرنات والاحتفالات مع الربع على طريق الشاليهات. عند البعض الآخر يمكن تكون هذه العطلة آخر عطلة بالمخيم لأنه نهاية موسم المخيمات والبر. ويمكن هالعطلة تعني للبعض السفر سواء دبي أو البحرين أو أي وجهة من الوجهات القريبة — عمان، لبنان، الأردن أو يمكن تركيا. وعند البعض الآخر عطلة الأعياد الوطنية = شي واحد، وهو النوم في البيت تعويض عن سهر الأيام اللي فاتت.

 لكن من الممكن استغلال العطلة في شي ثاني وهو انها تصير check point أو نقطة نوقف عندها ونشوف احنا شنو سوينا خلال الثلاث أشهر اللي فاتت من بداية السنة. هل مشينا على الخطة اللي حطيناها حق نفسنا؟ ولا هل بدينا نخوره من أول شهرين بالسنة؟ مهما كانت أهدافنا — التخلص من الوزن الزايد، بناء عضلات الجسم، تعلم مهارة يديدة، الإقلاع عن التدخين — هل ابتدينا فعلاً ببداية هذا الشي ولا لا؟ إذا لا، يا ترى شناطرين؟

 من الممكن ان الواحد يحاول يعطي نفسه وعد ان يكون حقق أحد أهدافه بعد مرور سنة، يعني يقول في العيد الوطني الياي راح أكون نزلت هالكثر، أو راح أكون سويت كذا أو راح أكون شريت كذا. أهم شي أن الواحد يحط خطة وهدف ويسعى، وأهم شي ان يخطي عالأقل خطوة.

Share This:

Leave a Reply

Your email address will not be published. Required fields are marked *